Góðar fréttir./.....og þá kom mjög slæm

Þetta eru góðar fréttir !  Við þurfum allt okkar besta fólk úr ÖLLUM flokkum til að reyna að bjarga landinu.

Frísk Ingibjörg Sólrún er tvímælalaust í flokki okkar bestu.  Skal  viðurkenna að mér leist ekki á það ef  Lúðvík Bergsteinsson eða "þessi fallegi Dagur" ættu að taka við.

Núna þurfum við fólk með dug, ekki snakkara !

Sú  slæma

Ég varð gáttaður þegar ég hlustaði á ávarp forsætisráðherra í hádeginu í dag.  Hugsaði hvað næst ? Það er óskandi að Geir náði bata og þess óskar þjóðin hvar í flokk sem menn standa, ja nema ef vera skyldi ómennið hann Hörður Torfason.

 

 

Um góðkynja æxli að ræða

Messiash hinn nýji

Já og Lúðvík mun leiða okkur út úr myrkrinu !! Húrra,húrra og lengi lifi Ísland !!Hvernig ætlar hann að sanna það fyrir okkur ?  Hví núna ? Eftir hverju hefur Samf. verið að bíða ?

Rúmlega 100 dagar og ég hef ekkert sé ennþá sem gefur til kynna að þessi flokkur getir endurreist okkur.  Hef s.s ekki séð neitt frá hinum heldur. 

'Eg hef bara ekki nokkra trú á því að Lúðvík hafi nokkuð fram að færa sem hjálpar til við endurreisn landsins

Okkur er treystandi

Auðvita er þetta allt löglegt

Þessir menn eru engir asnar það veit maður,  auðvita vissu þeir og vita enn í dag hve langt má ganga áður en þeir gerast lögbrjótar.  Við sitjum því miður uppi með pakkann og getum ekkert gert !

Auðvita er maður reiður, sár  og illur en það stoðar ekki neitt.  Breytir engu nema því að manni líður illa og hefur áhyggjur af því hvað verður.  Þjóðhagsspá í hádeginu var heldur ekki til þess falinn að auka manni bjartsýni.

Það sem þessi ágæti maður gæti hinsvegar svarað kannski er sú spurning hvort honum hafi ekki fundist bankakerfið vera orðið alltof stórt ?  Hvort honum hafi ekki dottið í hug að þeir yrðu nú að fara að stoppa því bólan gæti sprungið ?

Ef sú hugsun hefur ekki gert vart við sig í hans kolli þá er hann ótrúlega óábyrgur.   Ég nenni ekki að tala um eftirlitsstofnun þá sem átti að gæta þeirra, veit bara að hefði ég klúðrað mínu starfi eins og þeir sínu þá væri ég ekki með vinnu í dag. 

Ég er eins og mikill meirihluti þessa lands reiður og vil sjá breytingar en trúið mér þeir einu sem tapa erum við.  Við töpum  þeir muldra kannski "Hafi mér orðið á þá biðst ég forlást".

Sigurður segir engin lög hafa verið brotin

Æðislega Jóhanna !

Hún segir laun bankastjóra alltof  mikil !  Frábært !

Hún segir að eftirlaunalögin séu afleit ! Frábært !

Heilög Jóhanna það má kannski benda þér á þá staðreynd að þú ert í

ríkistjórn og getur því reddað þessu hratt og örugglega !

Það er allveg óþolandi að heyra endalaust tal en ekki nett um athafnir.

 

 

Bankastjórarnir með of há laun

Auglýsingar á samdráttartímum.

Ég hef áhuga á mörgu, td markaðsfræði.  Reyni að lesa  það sem ég kemst yfir, nýt góðs af félaga mínum sem fiskar upp allt það nýjasta sem á boðstólnum.

Nú þegar allir keppast við að segja að skollið sé á með bullandi kreppu,  er óhætt að segja að skrif Friðriks Eysteinssonar frá árinu 2002 um auglýsingar á samdráttartímum sé fróðleg lesning.

Mér þykir reyndar þessi grein svo góð að ég fékk samþ hjá FE til að setja hana hér inn.  Ath er s.s ekki að skreyta mig með annara fjöðrum.

 

 Auglýsingar á samdráttartímum

“Ég var spurður hvað mér fyndist um samdráttinn.  Ég sagðist hafa hugsað um hann en ákveðið að taka ekki þátt í honum.”  - Sam Walton. 

Á samdráttartímum (hvort sem þeir ná til hagkerfisins í heild eða einstakra atvinnugreina) eru það fyrstu viðbrögð margra auglýsenda að skera niður auglýsingakostnað. 

Í því sem hér fer á eftir verður leitast við að varpa ljósi á hvort það borgar sig að rifa seglin í auglýsingagerð og birtingum á samdráttartímum eða hvort auglýsendur geta, eins og Sam Walton heitinn, tekið  ákvarðanir um að verða ekki fórnarlömb samdráttarins!  

Í rannsókn sem gerð var á 183 fyrirtækjum í Bretlandi (Baxter 1999) kom í ljós að þó arðsemi flestra fyrirtækja minnki á samdráttartímum þá högnuðust þau fyrirtæki sem juku auglýsingaútgjöld sín umtalsvert meira en þau fyrirtæki sem drógu úr þeim eða héldu í horfinu.  Þessi fyrirtæki juku líka hagnað sinn miklu hraðar en hin eftir að samdrættinum lauk. 

Að lokum þá stækkuðu þeir sem bættu í á samdráttartímum markaðshlutdeild sína þrisvar sinnum hraðar þegar aftur fór að rofa til en þeir sem höfðu dregið saman seglin (rannsóknin náði ekki til fyrirtækja sem dottið höfðu út af markaðnum en þar af leiðandi getur hlutdeild allra aukist). 

Niðurstöður rannsóknar sem gerð var á um 1.000 fyrirtækjum m.a. í Bandaríkjunum og Evrópu sem gengu í gegnum samdráttartíma (Hillier 1999) benda  til þess að ekki sé marktækur munur á arðsemi þeirra fyrirtækja sem juku útgjöld sín til markaðsmála (þ.m.t. auglýsingagerðar og birtinga) á meðan á samdrætti stóð og þeirra sem drógu úr þeim. 

Hagnaður þeirra sem juku útgjöldin jókst aftur á móti miklu mun hraðar en hagnaður annarra þegar aftur fór að rofa til (hagnaður þeirra sem drógu saman seglin minnkaði reyndar) og markaðshlutdeild þeirra stækkaði þrisvar sinnum hraðar en markaðshlutdeild þeirra sem skáru niður (sama athugasemd og í  málsgreininni hér að ofan). 

  

Hillier vill skipta kostnaði fyrirtækja í “góðan” og “slæman” .  Góðan kostnað á að auka á samdráttartímum en draga úr þeim slæma.  Góður kostnaður samkvæmt rannsóknum Hilliers er kostnaður tengdur markaðsmálum, gæðum og vöruþróun og nýjum vörum/þjónustu.  Aukin útgjöld á þessum sviðum leiða til meiri arðsemi að samdrættinum loknum (að því gefnu auðvitað að þau hafi leitt til þess að neytendum finnist þeir fá meira fyrir peningana en áður). 

Munurinn á arðsemi þeirra fyrirtækja sem auka þessi útgjöld og þeirra sem draga úr þeim meðan á samdrættinum stendur er aftur á móti ekki marktækur. Til slæms kostnaðar á samdráttartímum telst hár framleiðslukostnaður og skrifstofu- og stjórnunarkostnaður.

      

En hvernig stendur á því að þeim fyrirtækjum sem fjárfesta meira í  auglýsingagerð og birtingum á samdráttartímum vegnar að meðaltali betur en þeim sem ekki gera það? 

Svarið er í raun sáraeinfalt.  Ef allir keppinautar á markaði héldu sínu striki þ.e. sama magni og gæðum í auglýsingagerð og birtingum og áður myndi markaðshlutdeild þeirra haldast nokkuð stöðug. 

Auglýsingar gegna nefnilega sama hlutverki í samdrætti og uppsveiflu þ.e. að hafa yfirleitt fyrst og fremst áhrif á það hvaða vörumerki er keypt.  Á samdráttartímum virðast það aftur á móti vera “ósjálfráð” viðbrögð margra auglýsenda að draga úr fjárfestingum sínum í auglýsingagerð og birtingum (gera færri eða lélegri auglýsingar og/eða draga úr birtingum). 

Þetta leiðir til þess að baráttan um athygli neytenda minnkar og söluáhrif auglýsinga þeirra sem halda óbreyttri stefnu eða auka fjárfestingar sínar aukast (þ.e. söluáhrif auglýsinga keppinauta jafnast ekki út í jafnmiklum mæli og áður). 

Þessu til viðbótar er oft mun ódýrara að ná til neytenda á samdráttartímum vegna hagstæðari samninga við miðla og vegna þess að auglýsingakraðak (e. clutter) minnkar.  Þannig er hægt  að ná auknu auglýsingaáreiti (dekkun x tíðni) fyrir sömu fjárhæð og áður og ef auglýsingarnar virka að auka þannig sölu og stækka markaðshlutdeild vörumerkja með ódýrari hætti en þegar þensla ríkir. 

  

Rannsóknir benda til þess að stærri markaðshlutdeild leiði venjulega til meiri arðsemi (Buzzell 1987).  Þeir auglýsendur sem ná að stækka markaðshlutdeild sína á samdráttartímum með því að auka verðmæti vörumerkja sinna í augum neytenda  njóta þess í meiri arðsemi þegar samdrættinum líkur og salan í vöruflokknum eykst á ný. 

Auglýsingar hafa, bæði á samdráttar- og uppgangstímum, bein áhrif á “sýnileika” vörumerkja (e. saliance).  Jafnframt því geta auglýsingar aukið verðmæti vörumerkja (e. added value) sem aftur leiðir til þess að neytendum finnst þeir fá meira fyrir peningana. 

Hvort tveggja hefur áhrif á atferli sem aftur endurspeglast í sölu og þar af leiðandi aukinni markaðshlutdeild.  Möguleikinn á að stækka markaðshlutdeild í gegnum auglýsingar virðist vera mestur þegar samdráttur er á markaðnum (Biel 1990).

                           

Það virðist liggja nokkuð ljóst fyrir hvað auglýsendur eiga almennt að gera á samdráttartímum (ekki endilega þó rétt fyrir öll fyrirtæki alltaf).  Þeir eiga að viðhalda eða bæta í hvað auglýsingagerð og birtingar varðar og þannig að stefna að stærri markaðshlutdeild þegar það er auðveldast að gera það (að því gefnu að keppinautarnir dragi saman seglin). 

Jafnframt hafa þeir ýmsa möguleika á því að draga úr kostnaði t.d. með því að afla tilboða í auglýsingagerð og í gegnum betri samninga við miðla (einir eða með öðrum auglýsendum). 

Aldrei er heldur meiri þörf en á samdráttartímum á því að taka upp þóknanakerfi fyrir auglýsingagerð (hugmyndavinna og hönnun) og birtingaáætlanagerð (og pöntun á auglýsingaplássi) og leita tilboða í framleiðslu auglýsingaefnis þó þetta séu allt hlutir sem gera á hvort heldur sem samdráttur ríkir eða ekki. 

Aldrei er heldur meiri ástæða til að vanda vel birtingaáætlanagerðina (rétt tíðni, dekkun og tímasetning birtinga og lágmörkun birtingakostnaðar miðað við þá tíðni og dekkun). 

        

En þó að markaðs- og söludeildin hafi hugsað um samdráttinn og ákveðið að taka ekki þátt í honum getur vel verið að fjármáladeildin hafi ákveðið að gera það! 

Friðrik Eysteinsson, rekstrarhagfræðingur,formaður Samtaka auglýsenda. 

Heimildir:Alexander L. Biel and Stephen King, Options and Opportunities for Consumer Businesses: Advertising During a Recession, The WPP Center for Research & Development, October 1990. 

Marilyn Baxter, “Advertising and profitability: the long-term returns”, Admap, July 1999. 

Robert D. Buzzell and Bradley M. Gale, The PIMS Principle, The Free Press, 1987. 

Tony Hillier, “Successful competitive strategies for recession & recovery”, Market Leader – The Journal of the Marketing Society, NTC Publications Ltd., Issue 4, 1999.

 

 Ruv.is/greinar 7. marz 2002.

 

Það er svo gaman að syngja !

Ég á það til að "bresta í söng" þegar mér finnst það rétt og staður og stund er.  Ákveðið vandmál er kannski að ég á það til að fara ekki allveg rétt með texta og hef jafnvel farið rangt með í mörg ár.

Dæmi er td Áfram stelpur ekki það að ég haldi eitthvað sérstaklega uppá það lag, maður syngur bara það sem kemur í hausinn í það og það skiptið. 

Ég söng í 34 ár  "Já ég borið get og vil". Áttaði mig að vísu ekki á hvaða mál það var fyrir konur að geta borið,  og þótti illskiljanlegt að það væri svona eftirsóknarvert !

Það var svo konan mín sem kom heim með sönghefti með textum frá fyrsta kvennafrídeginum og þá sá ég að þar var talað um að þora ! "Já ég þori get og vil !!

Það var líka vinsælt hjá mér að raula með Ragnhildi Gísla. um draumaprinsinn sem hún sá taldi ég bregða fyrir á ballinu þegar hún var að vonast til þess að sjá Benjamín á ballinu !

Enskir textar hafa líka "legið" vel fyrir mér, td Prefab Sprout lagið Kings of rock and roll, þið munið kannski "hot dog jumping frog Albuquerque '  Ég söng I want cookie.

Bítlarnir sungu "she gotta ticket to right o.s.frv.  Ég gat ekki skilið hvað Bítlarnir væru að blanda einhverri íslenskri Siggu í málið.

Svo var ég eins að ég bara held flestir á því  að Helga Möller væri að tala um mestu eldvarna hátiðina þar til fyrir 4 árum.

Í restina kemur svo saga af ungum manni sem vildi endilega fara með bæn og sagði mjög þungur á brún og með festu þess sem er að fara að ræða mál við þá himnafeðga. "Það er komið vor, þúúú sem ert o.s.frv.

 

Hvorki vott né blautt !!

Eitt af því sem ég safna eru "gullkorn " sem menn láta frá sér fara í hita leiksins.

Hér koma nokkur dæmi.:

Lögregla hér í bæ sem þurfti að skamma háværan fanga sagði.  "Þegi þú! Þú færð hvorki vott né blautt.

Sami maður sagði líka. "Segðu mér kennitölu þína steinþegjandi og hljóðlalaust !"

Þessi er lika ættuð frá honum. "Annað hvort kem ég sjáfur eða á bílnum.

Félaginn talaði líka um "Vöntun á hæfileikaleysisskorti !

Með þessu bloggi hef ég unnið veðmál, átti að skrifa 3 færslur.  Búið og gert og get því hætt.

Vænti þess að fá vinning minn í fyrramálið, eða hvað Pétur ?

 

 

 

Ég sé um hendurnar.

Ég er mjög ríkur á þrjú frábær börn með góðri konu og það er að vera ríkur.  Eitt það skemmtilegasta sem ég geri er að hjálpa því yngsta í draumalandið. 

Ég þrátt fyrir aðvaranir Siðmenntar,  geri mig sekan um það að fara með bænir með þeim stutta svona áður en við gerum alvöru atlögu að Óla lokbrá. 

Minn  maður er nú oftast nokkuð til í slaginn þangað  til í kvöld að hann var þreyttur og vildi gera samning við mig.  "Pabbi ég sé um hendurnar,  þú ferð með vísuna um brauðið og málið er dautt" sagði sá stutti !

Ef einhver er ekki viss  hvað hann átti við með vísu um brauðið þá ......

 

Mokið meiri snjó !

Það var minnir mig hljómsveit Þorsteins Gunnarssonar frá Selfossi sem söng um snjómokstur í denn. Lag og texti sló í gegn og var mikið spilað í óskalögum sjómanna og líka sjúklinga.

Það er hinsvegar óhætt að fullyrða að sú ákv. bæjaryfirvalda að spara peninga og  ryðja ekki  götur  bæjarins í dag sló ekki í gegn.  Hætt er við að margir hafi bölvað illilega í dag þegar þeir komust ekki leiðar sinnar vegna þess að ekki mátti moka. 

Ekki halda að ég sé að tuða þetta vegna þess að ég hafi fest Strumpastrætóinn okkar Glitnis í dag, nei, nei það gerði ég í gær

Mér finnst að moka eigi þegar moka þarf.